Во обид да помогне во зајакнување на образовната инфраструктура и подигнување на студентското искуство во земјата, Европската Унија во соработка со KFW и WBIF програмата за Западен Балкан со гордост го започнува проектот „Енергетски ефикaсна рехабилитација на студентските домови во Северна Македонија“. Со цврста посветеност кон негување на следните генерации студенти, оваа иницијатива најавува нова ера на подобрени животни стандарди и погодни средини за учење за студентите ширум земјата.

Главната цел на проектот е да се ревитализираат постоечките капацитети за сместување на студентите, да се решат долгогодишните предизвици и да се обезбедат современи услови за да се задоволат потребите на идните студенти. Со подобрување на средината и условите за живеење и учење, проектот има за цел да ги поттикне студентите да напредуваат академски, социјално и лично.

Проектот се реализира од страна на Министерството за образование и наука на Република Северна Македонија преку поддршка од 20 милиони евра кредит од KfW Германската Развојна Банка и 5 милиони евра грант преку WBIF Програмата за регионална енергетска ефикасност за Западен Балкан (REEP+) на Европската Унија.

По потпишувањето на договорот кон крајот на минатата година помеѓу Министерството за образование и наука и економскиот оператор „Strabag“ кој ќе ги изведува градежните активности, со започнување на градежните активности во студентскиот дом „Кузман Јосифовски Питу“ во Скопје се означува почетокот на првата фаза од проектот. Реконструкцијата вклучува најпрво подобрување на целокупната енергетска ефикасност на објектите, како и неопходни подобрувања на структурата на објектите, инвестиции за подобрување на условите за живеење и учење, подобрување на функционалноста, односно севкупно подобрување на комфорот во објектите. Согласно утврдената динамика, предвидено е активностите за реконструкција на студентските домови „Кузман Јосифовски Питу“ и „Стив Наумов“ да траат 18 месеци, а проектот предвидува понатамошна реконструкција на уште седум студентски домови во Скопје, Прилеп, Битола, Штип и Охрид.

Централно место во заложбата на Европската Унија и нејзините партнерски организации е цврстата посветеност на одржливост и промоцијата на енергетската ефикасност како клучни столбови на современиот развој. Со давањето приоритет на енергетската ефикасност во структурата и работењето на студентските домови и со инкорпорирање на нови, модерни и енергетски ефикасни технологии и практики, проектот дава придонес кон зачувување на животната средина и подобрување на животниот стандард на студентите.

Клучната цел на овој проект е да се допринесе во активностите за заштита од климатски промени со намалување на СО2 емисиите и создавање на подобри услови за живеење и учење и подобрување на животниот стандард на студентите во Северна Македонија. Студентските домови ќе добијат комплетно нов лик и подобрена одржливост и енергетска ефикасност, што ќе придонесе за почиста животна средина и за финансиски заштеди, а истовремено студентите ќе добијат подобри услови за учење и живеење.

Во суштина, посветеноста на одржливост претставува сеопфатен пристап кон целокупниот развој – оној кој дава приоритет на благосостојбата и на сегашните и идните генерации, го поттикнува економскиот просперитет и ја заштитува планетата која ја нарекуваме дом. Преку заеднички напори како што е овој проект, Европската Унија се стреми да ја реализира оваа визија, поставувајќи ги темелите за посветла, поодржлива иднина за сите.